आईसीसी विश्वकप लिग-२ अन्तर्गतको खेलमा नेपालले स्कटल्याण्डसँग प्रतिस्पर्धा गरिरहेको छ। कीर्तिपुरस्थित त्रिभुवन विश्वविद्यालय क्रिकेट मैदानमा जारी खेलमा स्कटल्याण्डले नेपालसामु २४४ रनको लक्ष्य प्रस्तुत गरेको छ।
टस जितेर पहिले ब्याटिङ गरेको स्कटल्याण्डले निर्धारित ५० ओभरमा ८ विकेट गुमाउँदै २४३ रनको योगफल तयार पारेको हो।
स्कटल्याण्डका लागि जर्ज मुन्सीले सर्वाधिक ७७ रनको योगदान दिए। त्यस्तै माइकल फिन्ले म्याकक्रेथले ३५ रन, इङ्गलिसले अविजित ३४ रन, माइकल लिस्कले २९ रन, मार्क वाटले २४ रन तथा म्याथ्यु क्रसले १८ रन जोडे।
नेपालका तर्फबाट बलिङमा उत्कृष्ट प्रदर्शन गर्दै सन्दीप लामिछाने ले १० ओभरमा १ मेडेनसहित ४१ रन खर्चेर ४ विकेट लिए। यस्तै करण केसी ले ८ ओभरमा ५१ रन खर्चेर २ विकेट लिए भने नन्दन यादव ले ८ ओभरमा ३३ रन दिएर २ विकेट आफ्नो नाममा दर्ता गरे।
