जल तथा मौसम विज्ञान विभागले आज देशभरका विभिन्न प्रमुख सहरहरूमा मेघगर्जन र चट्याङ्गसहित वर्षाको सम्भावना रहेको जनाएको छ।
विभागले जारी गरेको सहरको मौसम पूर्वानुमान अनुसार आज दिउँसो र राति धेरैजसो स्थानमा मध्यम तथा केही स्थानमा हल्का वर्षा हुनेछ।
आज दिउँसो काठमाडौँ, पोखरा, डडेल्धुरा, जुम्ला, ओखलढुङ्गा, धनकुटा, विराटनगर, धरान, जिरी र ताप्लेजुङमा ६० प्रतिशत वर्षाको सम्भावना छ। यी क्षेत्रहरूमा दिउँसो मेघगर्जन तथा चट्याङ्गसहित मध्यम वर्षा हुने पूर्वानुमान गरिएको छ।
दिपालय, वीरेन्द्रनगर, घोराही, भैरहवा र जोमसोममा ४० प्रतिशत वर्षाको सम्भावना रहँदा सिमरा र जनकपुरमा ३० प्रतिशत वर्षाको सम्भावना छ। धनगढी र नेपालगञ्जमा भने दिउँसो मेघगर्जन/चट्याङ्गसहित हल्का वर्षा हुने र वर्षाको सम्भावना ४० प्रतिशत रहने तालिकामा उल्लेख छ।
आज राति पनि देशभरका सहरहरूमा मेघगर्जन र चट्याङ्गसहित मध्यम वर्षाको सम्भावना छ। राति धनकुटा, जिरी र ताप्लेजुङमा वर्षाको सम्भावना ७० प्रतिशतसम्म रहनेछ। त्यस्तै धनगढी, नेपालगञ्ज, पोखरा, भैरहवा, काठमाडौँ, ओखलढुङ्गा, विराटनगर, धरान र जनकपुरमा ६० प्रतिशत वर्षाको सम्भावना छ।
तापक्रमको दृष्टिले आज नेपालगञ्ज, धनगढी, दिपालय र भैरहवाको अधिकतम तापक्रम ३४ देखि ३६ डिग्री सेल्सियससम्म पुग्ने अनुमान गरिएको छ। राजधानी काठमाडौँको अधिकतम तापक्रम २७ देखि २९ डिग्री सेल्सियस र न्यूनतम तापक्रम २० देखि २२ डिग्री सेल्सियस रहनेछ।
हिमाली क्षेत्र जोमसोमको न्यूनतम तापक्रम १४ देखि १६ डिग्री सेल्सियससम्म झर्ने पूर्वानुमान छ।
